Ghazal ki shab hai, sitara hai mahtaab bhi hai!
Nazar hai, aankhen hain manzar bhi hai, so khwaab bhi hai!!
Wahi fareb-e-nazar hai wahi yaqeen-e-nigah!
Wo jalwa rez bhi hai, saamne hijab bhi hai!!
Ye mera dil hai, use chahe jis tarah se padhun!
Wo harf bhi hai, ibarat bhi hai kitaab bhi hai!!
Wo ik wajood mein, do baat rakhne wala hai!
Mera sukoon bhi hai aur izteraab bhi hai!!
Pasand usko kiya hai, tamaam duniya mein!
Wo dhadkanon ki talab, dil ka intekhaab bhi hai!!
Woh mas'ala bhi hai aur mas'ale ka hal "Resham"!
Wahi sawaal bhi hai aur wahi jawaab bhi hai!!
Reshma Zaidi